الحيـا مـن اللّـي خـلـق هالعـالـم ومغنيـهـا

السّمـا هـذا سمـاه .. القـاع هــذي قـاعـه

وجعـل نفـسٍ تستمـر فـي معصيـة باريـهـا

تبطـي وهـي بيـن ظلعيـن الحـنـك نـزّاعـه

لاجفتـك الـديـره وظـاقـت بــك وباهليـهـا

وجـاك مـن جيـش الهمـوم اثعالتـه واسباعـه

وفسقـة العالـم .. ونـاقـم خبلـهـا صاحيـهـا

وحكيـة الرّويبضـه .. وانبـطـروا الـزّرّاعـه

غط خشمـك فـي التّـراب وقـول : يـا مفنيهـا

افننـي وانـا مسبـحٍ لــك بسـمـع وطـاعـه

راكـب اللّـي ضمّـر مـن اسهابـهـا جنبيـهـا

أولـف مـن الجـد .. ومـن ظلالهـا جـزّاعـه

لااوقـفـت رزّت قواصيـهـا عـلـى دانيـهـا

ولامشـت يطـري عليـك الـهـوش والفـرّاعـه

لـون مقدمهـا ( صبـاح الخيـر ) يـا راعيهـا

ولـون موخرهـا مـثـل ماتشـعـل الـولاّعـه

فـي نحرهـا المجـد والخيـر الرّضـي قافيهـا

وفـي وسطهـا غـاروا الشّيـخـان والفـزّاعـه

ايعقـب سوّامهـا .. قـبـل ايخـسـى شاريـهـا

مــا تجـمّـع عنـدهـا الــدّلاّل والبـيّـاعـه

مـن مرابـط عـز وراعيهـا مهـوب مصخيهـا

مايودّعهـا الـمـودّع عـنـد اخــوه اوداعــه

امخشوشـه ليـن ياتـي فـي السِّبـق طاريـهـا

ولااظهـرت لفّـت رقـاب العـالـم الطّمّـاعـه

كنّهـا فـي موكـب ( الـسّـوّاس ) وامباريـهـا

بنـت اميـرٍ مـن كثـر طيبـه تحشـم اتبـاعـه

وكـن الارض تقـول فيهـا : يـا اللّـه اتحيّيهـا

جعلـه ابـرك يـوم جيتـي فيـه وابـرك ساعـه

ولاابتدى المركـاض وجتـك الخيـل مـن تاليهـا

جاتك أوّلها .. تقـل فـي ذيلهـا ( درّاعـه ) ..!!

ضـرب يدّيهـا علـى البيـدا قـبـل رجليـهـا

ضـرب أصابـع فـارعٍ تطبـع علـى طبّـاعـه

تنحـر اللّـي يعـرف القصّـه قبـل لااحكيـهـا

بـس .. ابحكيهـا عليـه وبـارفـع السّمّـاعـه

الرّجـال اشكـال وعاليـهـا عـلـى واطيـهـا

فيهـم الأدنـى .. والأدنـى .. والدّنـي بانواعـه

وفيهـم اللّـي لا بغـى لـه حـاجـه ايسوّيـهـا

مـايـردّه عـقـل ولا تحتـمـيـه أطـبـاعـه

وفيهـم اللّـي لا رمـى الـطّـولات مايخطيـهـا

كـل ماهبّـت هبـوب الطّيـب فــل اشـراعـه

وفيهـم اللّـي يـاخـذ الحسـنـه ولا يجزيـهـا

وهذا ابشع شيء .. واردى نوع .. واكبـر راعـه

وفيهـم اللّـي جاتـه الدّنـيـا وهــو هاويـهـا

حظّـه ايكسّـب لـه اللّـي مـا كسبـه اذراعـه

وفيهـم اللّـي علّتـه فــي جوشـنـه كانيـهـا

ماتسولفـهـا زوايــا خافـقـه لـاظـلاعــه

وفيهـم اللّـي شـل هــم الـنّـاس ومحاتيـهـا

ومافلح في اوضاعهـم .. ولا التفـت لـاوضاعـه

وفيهـم اللّـي لا حكـى كلمـه مهـوب يثنيـهـا

وفيهم الزّيزوم .. ووجـه الخيـر .. والطّرقاعـه

والحيـاه .. أشيـاء تتراكـم عـلـى بعضيـهـا

مـا يفـرّق بعضهـا الاّ مـن يحسـب اوجاعـه

واللّـه انّـي صـرت لا ابغضـهـا ولا ادانيـهـا

معتبـر نفسـي متـاجـر والـصّـلاة بضـاعـه

لان قلبي مـن عـرف وش فـي الصّـلاة وفيهـا

غاديٍ كنّه وهي .. ( البزر ) و ( المرضاعه ) ..!!

ووالـلّـه يــا رجــلٍ يجنّبـهـا ولا يدّيـهـا

إن مالـه خانـه .. ومافـي عـمـره اطمـاعـه

وانـت لـو زلّيـت عـنـدي زلّـتـك ناسيـهـا

وجعل كبـد اللّـي مهـوب يغليـك سـم اللاّعـه

صاحـبـي ماتـعـرف الانـفـس ولا خافيـهـا

النفـوس مـن النفـوس الخافـيـه .. ملتـاعـه

صاحبـي مـرّ اللّيالـي مـن سـبـب حاليـهـا

صاحبـي انـزع مـن القلـب النبـيـل قنـاعـه

ما انت بـ( امكوّش ) علـى الدّنيـا ولا محصيهـا

انشـد اللّـي لاعـب الدّنيـا بـراس أصبـاعـه

ستـه 26 وعشريـن عـام افلّـهـا واطويـهـا

صبحـهـا رغّـابـه وفــي ليلـهـا منّـاعـه

صاحبـي جـنّـب حراميـهـا قـبـل حاميـهـا

صاحبي .. صاحبك مـن صدقـه يهـل ادماعـه

بـانصـحـك نصيـحـةٍ ماعـادنـي بثانيـهـا

دام عمـرك ساعـه .. اجعلهـا لربّـي طـاعـه